ساڵ له‌ دوای ساڵ خۆزگه‌مان به‌ پار. ساڵ له‌ دوای ساڵ که‌ تێپه‌رێ، په‌له‌مان نه‌کرد و به‌ بێ لێکدانه‌وه‌ی هۆ و هۆکاره‌کان هه‌ر خۆزگه‌ به‌ پار ده‌خوازین. له‌مه‌ سه‌یرتر ئه‌وه‌یه‌ که‌ سه‌ره‌تای هه‌ر ساڵێکیش پیرۆزبایی ساڵی تازه‌ له‌ یه‌کتر ده‌که‌ین. نازانم پیرۆزبایی له‌ چی؟ له‌ بێ ده‌ره‌تانی و بێ ئاسویی سیاسی و چاره‌نوسمان؟ ئه‌م ناته‌بایی و ته‌ناقزانه‌ کۆمه‌ڵێک ڕاستیمــان بۆ ئاشکرا ده‌کا که‌ میله‌تێکی سه‌رگه‌ردان و گه‌نده‌ڵ و سوکین.

میله‌تێکی هوشار و تێگه‌یشتو و ئازادیخواز قه‌ت ئیجازه‌ نادا که‌سانی گه‌نده‌ڵ و ڕیاکار و هه‌لپه‌ره‌ست بۆ ماوه‌یه‌کی دوور و درێژ به‌ ناوی سه‌رۆک و سه‌رکرده‌ و ڕێبه‌ر حوکمی به‌سه‌ردا بکا، ئه‌گه‌ر سوک نه‌بین به‌ هیچ شێوازێک سوکایه‌تی له‌ هیچ هێز و ده‌سه‌ڵات و که‌سێک قوبوڵ ناکه‌ین.
هه‌مو سوکایه‌تی و سه‌ودایه‌کمان به‌سه‌ره‌وه‌ ده‌که‌ن، هه‌ر ده‌لێین قه‌یناکا کوردین. ده‌مانگۆرنه‌وه‌ به‌ پێڵاوێکی ده‌سه‌ڵاتدارێکی فارس و تورک و عه‌ره‌بی داگیرکه‌ر، که‌ چی ده‌ڵێن پێلاوی سه‌رکرده‌یه‌کی کورد ناده‌ین به‌ فارس و تورک و عه‌ره‌ب. ئه‌وه‌ی تا ئێستا به‌سه‌رماندا هاتوه‌، خۆمان هۆکار و ته‌وه‌ری سه‌ره‌کین! بۆ ده‌رباز بون له‌ قه‌بوڵ کردنی مه‌سولیه‌تی گه‌نده‌ڵی و سوکیمان، بۆ پاساوی شکسته‌کان و مایه‌ پوچیمان هه‌میشه‌ ئه‌م و ئه‌ومان تاوانبار کردوه‌.
ساڵ له‌ ده‌وای ساڵ به‌ مشتێک ئاو ده‌که‌وینه‌ مه‌له‌ و به‌ دوو سوێند و به‌ڵێنی درۆینه‌ی گه‌نده‌ڵان و ریاکاران هه‌م فریو ده‌خۆین و هه‌م فریومان ده‌ده‌نه‌وه‌. سه‌رگه‌ردان و ماڵویران و نائومید تاوێک لای ئه‌میان به‌رده‌ده‌ین و پاڵ به‌ویانه‌وه‌ ده‌ده‌ین،‌ تاوێک‌ لای ئه‌ویان ده‌گرین و پاڵ به‌میانه‌وه‌ ده‌ده‌ین. ئه‌م ره‌وته باتڵ و به‌تاڵه ده‌یان ساڵه‌ وه‌ک مۆته‌که‌یه‌کی نه‌حس سه‌ردڵی گرتوین و به‌ بێ لێکدانه‌وه‌ خۆمان به‌رده‌واممان کردوه‌ و بوه‌ته‌ چاره‌نوسی تاریکمان.
له‌ لایه‌ک توره‌ و بێزارین له‌ گه‌نده‌ڵی و ریاکاری، له‌ لایه‌کیتر گه‌نده‌ڵ و ریاکار په‌ره‌ستین. له‌ لایه‌ک فیداکاری رێگای رزگاری نیشتمان و نه‌ته‌وه‌ین، له‌ لایه‌کیتر نه‌ته‌وه‌ فرۆش و نیشتمان فرۆش په‌ره‌ستین. له‌ لایه‌ک به‌ قسه‌ قاره‌مانی به‌ره‌وروبونه‌وه‌ی داگیرکه‌رانین، له‌ لایه‌کیتر دارده‌ستی داگیرکه‌رانین. ئه‌م ناته‌باییانه‌ له‌ ئێمه‌دا بوه‌ته‌ ده‌رونی و له‌ ناو بازنه‌یه‌کی داخراودا وێل و وه‌یلان و گێژ به‌ ده‌ور خۆماندا ده‌سورێینه‌وه‌. به‌دبه‌ختیه‌که‌ ئه‌ویه‌ که‌ کاتێک له‌م باره‌یه‌وه‌ قسه‌ له‌گه‌ڵ ئه‌م و ئه‌و ده‌که‌ی، نه‌ک هه‌ر مل ناده‌ن، به‌ڵکو حاشای لێده‌که‌ن و داوات لێ ده‌که‌ن بێده‌نگ بی و پێت ده‌ڵێن په‌له‌ مه‌که‌ هێشتا ساوایه‌.

ئه‌گه‌ر ئاورێک له‌ خۆمان بده‌ینه‌وه،‌ ده‌بینین ئه‌و ره‌فتار و ره‌وشته‌ ده‌زێوه‌ی گه‌نده‌ڵه‌کان و ریاکاره‌کان و هه‌لپه‌ره‌سته‌ ده‌سه‌ڵاتداره‌کان، ماساوچیه‌کان و مه‌سینه‌ هه‌ڵگره‌کان بوه‌ته‌ کولتور و ئه‌خلاق و ره‌وشتی رۆژانه‌مان و له‌ ئازاری قورسایی باره‌کانمان گاز له‌یه‌کتر ده‌گرین. له‌ هه‌مان کاتدا هه‌رکه‌سێک ده‌دوێنی، دڵی پره‌ و باسی نائومیدی و نامورادی ده‌کا، باسی خراپ بونی خه‌ڵک ده‌کا، باسی له‌ده‌ست چونی ڕاستی و پاکی ده‌کا. که‌س نییه‌ باسی نه‌مانی هه‌ست و سۆز و سیقه‌ نه‌کا. هه‌ر هه‌موو باسی زال بونی درۆ و ده‌غه‌ڵکاری له‌ داوده‌زگا و پێوه‌ندیه‌ کۆمه‌ڵاێه‌تیه‌کان ده‌که‌ن. هه‌ر هه‌مو گازنده‌ و گه‌له‌ له‌و دۆخه‌ ناسالمه‌ ده‌که‌ن که‌ تییدا برا نه‌ک هه‌ر ئاگای له‌برا نییه‌ و ره‌حمی پێ ناکا، به‌لکه‌ ئه‌گه‌ر مه‌سه‌له‌ی ئابوری بێته‌ ئاراوه‌، خه‌یانه‌تیشی پێ ده‌کا.

کولتوری زاڵ به‌سه‌ر کومه‌ڵگای کوردستاندا به‌ گشتی و کوردستانی باشور به‌ تایبه‌تی کولتوری دینی و عه‌شاێریه‌ که‌ برستی له‌ میله‌تی کورد بریوه‌ و رێگای گه‌شه‌ و پێشکه‌وتنی لێ به‌ستوه‌. ئه‌م کولتوره ته‌نیا پارێزه‌ری ده‌سه‌ڵات و قازانجی سه‌ران و ده‌ست و پێوه‌نه‌کانیانه‌. ئه‌م کولتوره‌ کاری وای کردوه‌ته‌ سه‌ر کۆمه‌ڵگا و تاکی کورد که‌ وه‌ک نه‌خۆشیی شێتی هه‌موانی توش کرده‌وه‌ و به‌ رونی ئاکامه‌ دزێوه‌کانی ده‌بینین. به‌ ئاشکرا ناکۆکی و گومان و بێ سیقه‌یی که‌سه‌کان به‌رانبه‌ر به‌ یه‌کتر ده‌بینین. کاتێک‌ به‌ شه‌قامه‌کان و کۆڵانه‌کان و بازاره‌کاندا تێده‌په‌رێ، هه‌ر هه‌مو مۆن و توره‌ و بێتاقه‌تن، لێره‌ و له‌وێ که‌سانێک ده‌بینی که‌ له‌سه‌ر هیچ و یان له‌سه‌ر بچوکترین شت په‌لاماری یه‌کتر ده‌ده‌ن و به‌یه‌کتریدا هه‌ڵده‌پژێن. کاریگه‌ریی سیسته‌می گه‌نده‌ڵ و ناعادل له‌ لایه‌ک و له‌ لایه‌کیتره‌وه‌ فشار و زه‌ختی ژیان و شوێنه‌واره‌کانی شه‌ری ناوخۆ و بێ یاسایی خه‌ڵکی کوردی وا لێکردوه‌ که‌ ڕێگا چاره‌ی هه‌موو شتێک‌ ته‌نیا له‌ شه‌ڕ و توندوتێژیدا ده‌بینن. ئه‌م هه‌مو گرژی و شه‌ر و شۆڕ و پێکدادانه‌ که‌ له‌ لێره‌ و له‌وێ ڕوو ده‌دا، جاروبار کوشتن و خوێنرشتنیشی لێ ده‌که‌ویته‌وه‌.

پرسیار ئه‌وه‌یه‌ که‌ ئایا کاتی ئه‌وه‌ نه‌هاتوه‌ که‌ ئه‌م بازنه‌ بشکێنین و بۆ داهاتویه‌کی گه‌ش و ڕون، بۆ خۆ ناسینه‌وه‌ و بنیاد نانی کۆمه‌ڵگایه‌ک که‌ یاسا ئینسانیه‌کان سه‌روه‌ر بێ نه‌ک خێڵ و عه‌شیره‌ و دین، ده‌ست به‌کار بین؟ ئایا کاتی ئه‌وه‌ نه‌هاتوه‌ که‌ بوێرانه‌ ده‌رگای سه‌رانی گه‌نده‌ڵ و سپڵه‌ بگرین و بڵێین: "بۆچی خۆتان بۆ قازانجی هاوبه‌شتان ئاشتن و یه‌کگرتو؟! به‌ڵام منداڵه‌کانی ئێمه‌ له‌ زیندانه‌کانتاندا ئه‌تک ده‌که‌ن، بێسه‌روشوێنیان ده‌که‌ن، به‌ تێک شکاوی و شێتی پاش (٧-٨) ساڵ سجن و شکه‌نجه‌ فره‌یان ده‌ده‌نه‌ سه‌ر جاده‌؟" کاتی ئه‌وه‌ نه‌هاتوه‌ که‌ له‌بری گاز گرتن له‌ یه‌کتر، مۆن و مۆره‌ کردن له‌ یه‌کتر، هه‌ڵچون و کۆشتنی یه‌کتر یه‌ک بگرین و پیلانه‌کانی ئه‌م چاوچنۆکه‌ له‌ تێر نه‌هاتوانه‌ پوچه‌ڵ بکه‌ینه‌وه‌؟
کاتی ئه‌و نه‌هاتوه‌ که‌ به‌ یه‌کخستنی ڕیزه‌کانمان سیاسه‌تی شه‌ڕ و دوبه‌ره‌کێ دروست بکه‌ و حکومه‌ت به‌که‌یان فه‌شه‌ل پێ بهێنین؟ کاتی ئه‌وه‌ نه‌هاتوه‌ که‌ بوێرانه‌ بۆ ڕێز گرتن له‌ خۆمان و خاک و وڵاتمان پێان بڵێین که‌ "ئه‌گه‌ر هه‌مومان کوردین و یه‌ک نه‌ته‌وه‌ین و یه‌ک ماف و ئامانجمان یه‌که‌، بۆچی خۆشیه‌کان و سه‌روه‌ت و سامانه‌که‌ی هه‌ر بۆ ئێوه‌ بێت و ئازار و مه‌ینه‌ت و مه‌رگ و ماڵوێرانیه‌که‌شی بۆ ئێمه‌؟

با! کات دره‌نگه‌ و ده‌بێ په‌له‌ بکه‌ین! ده‌بێ دوکانی کوردایه‌تیان پێ دابخه‌ین! ده‌بێ رۆڵه‌کانمان له‌ زیندانه‌کانی ئاکرێ و هه‌لێر و سلێمانی ئازاد بکه‌ین که‌ ڕووی زیندانه‌کانی ئه‌بوغرێب و گوانتانامۆیان سپی کردوه‌. کات دره‌نگه‌ و ده‌بێ په‌له‌ بکه‌ین بۆ ڕێگرتن له‌ فتواکانی مزگه‌وته‌کان و ئه‌مری سه‌رۆک عه‌شیره‌کان و یاسا ئیسلامیه‌کانی پارله‌مان که‌ کوردستانیان کردوه‌ته‌ گۆرستان و جه‌هه‌نم بۆ دایکان و خۆشکان و کچه‌کانمان. ده‌بێ ئیتر ئیجازه‌ نه‌ده‌ین له‌وه ‌زیاتر سوک و رسوای عاله‌ممان بکه‌ن. باڵه‌کانی ده‌سه‌ڵات به‌ ئاغا و مه‌لا و سه‌رۆک خێل و بنه‌ماڵه‌وه‌ به‌ سوئیستفاده‌ کردن له‌ به‌‌رپرسایه‌تی ئێمه‌ به‌رانبه‌ر به‌ ‌نه‌ته‌وه‌ و نیشتمان هه‌ر خه‌ریکی خۆ قه‌ڵه‌و کردن و خۆ ده‌وڵه‌مه‌ند کردنن. کاتی واز هێنان له‌م یه‌کلایه‌نه‌ به‌رپرسایه‌تیه‌ هاتوه‌ و ده‌بێ چیتر ئیجازه‌یان پێ نه‌درێ به‌ بیانوی ئه‌وه‌ی که‌ چوار ده‌ورمان گیراوه‌، هه‌له‌که‌ ناسکه‌ و ده‌بێ ئه‌زمونه‌که‌مان له ‌ده‌ست نه‌ده‌ین. ئه‌زمونه‌که‌ ته‌نیا گیرفان و پله‌ و به‌رژه‌وه‌ندی سه‌رانی ده‌سه‌ڵات داره‌ و میله‌ت لێی بێ به‌شه‌. ئه‌زمو‌نه‌که‌ جگه‌ له‌ ئاواره‌یی سه‌دان هه‌زار کورد، کۆژرانی هه‌زارانیترمان به‌ ده‌ستی یه‌کتر، له‌ناوچونی هه‌زارانی ترمان له‌ رێگای هه‌ڵهاتن به‌ره‌و هه‌نده‌ران، شێت بون و بێ سه‌روشوێن بونی هه‌زارانیترمان له‌ ژێر شکه‌نجه‌ و زیندانه‌کانیاندا، هه‌ژاری و بێ هیوایی و چاره‌ ره‌شی هیچیتر نه‌بوه‌. کاتی ئه‌وه‌ هاتوه‌ که‌ کۆتایی به‌ سه‌رۆک سازی و ره‌ئیس سازی بێنین و له‌بری سه‌رۆک و ره‌ئیس خزمه‌تکار جێگایان بگرێته‌وه‌. کاتی ئه‌وه‌ هاتوه‌ که‌ حاکم و حوکم له‌ له‌سه‌ر ته‌ختی حاکمیه‌ت بهێنرێته‌ خوار و به‌ڵێ بۆ میله‌ت بچێته‌ سه‌ر ته‌خت.
به‌ سه‌دان هه‌زار چه‌کداری مشه‌ خۆر له‌ کوردستان هه‌ن که‌ ته‌نیا بۆ سه‌رکوتی میله‌ت ئاماده‌ کراون. ئه‌و چه‌کدارانه‌ که‌ ناویان هێزی پێشمه‌رگه‌یه‌، تا ئێستا نه‌یانتوانیوه‌ و ناتوانن سنوره‌کان و سه‌ر و ماڵی میله‌ت بپارێزن. هه‌رکات داگیرکه‌ران قه‌ستی له‌شکر کێشی و په‌لاماری کوردستانیان بوبێت، هێزی پێشمه‌رگه‌ نه‌ک پێشی پێ نه‌گرتون، به‌لکو هاوکاریانی کردوه‌ و شان به‌ شانی داگیر که‌ران هه‌م یه‌کتر و هه‌م میله‌تیان ته‌فروتونا کردوه‌. هێزی پێشمه‌رگه‌ به‌ سامانی میله‌ت په‌روه‌رده‌ ده‌کرێ له‌ دژی میله‌ت، یان ئاماده‌ ده‌کرێته‌وه‌ بۆ دیسان شه‌ڕی ناوخۆ. هێزی پێشمه‌رگه‌ بۆ سه‌رکوت کردن و ده‌مکوت کردنی مامۆستایانی به‌ش مه‌ینه‌تی مه‌کته‌ب و زانکۆ، خوێندکارانی نارازی و چین و توێژه‌ هه‌ژار و نه‌داره‌ نارازیه‌کان ئاماده و‌ ته‌یار کراوه‌ نه‌ک بۆ پاراستنی خاکی کوردستان و سه‌روماڵی هاوڵاتین. ده‌بێ کۆمه‌ڵانی خه‌ڵكی کوردسان کور و کچه‌کانیان که‌ به ناوی هێزی پێشمه‌رگه‌وه‌ خه‌ریکی سه‌رکوت و شکه‌نجه‌دانی لاوانن له‌زیندانه‌کان، داوایان لێ بکه‌ن ریزی خه‌یانه‌ت به‌جێ بێڵن و بگه‌رێنه‌وه‌ ریزی میله‌ت.

جێی داخه‌ برێک حیزب و رێکخرای سیاسی که‌ هیچ باوه‌رێکیان به‌ هێزی جه‌ماوه‌ر و خۆشیان نه‌ماوه‌، له‌ کاتێکدا که‌ جه‌ماوه‌ر له‌ دژی ده‌سه‌ڵاتی گه‌نده‌ڵ ده‌ستی داوه‌ته‌ خۆ ئاماده‌ کردن بۆ وه‌لانانیان، ئه‌وان ئێستا داوا له‌ ده‌سه‌ڵاتدارانی دژی قانون ده‌که‌ن که‌ مه‌جال و ئیجازه‌ی قانونییان بده‌نێ که‌ هه‌ڵسورانیان هه‌بێ. داوا لا ده‌سه‌ڵاتی عه‌شاێر و دژ به‌ یاسا ده‌که‌ن که‌ ئیجازه‌یان بده‌نێ به‌ شێوه‌ی قانونی. خه‌ڵک له‌ دژی ده‌سه‌ڵات رێک بخه‌ن، به‌راستی ئه‌مه‌ ئیتر ئه‌وپه‌ری گێلی و ئیفلاسی سیاسی و ئه‌خلاقیه‌. داواکاری ئه‌مانه‌ ئه‌وه‌نده‌ بێ مانایه‌ که‌ شێتیش شتی وا ناڵێ. خواستی ئه‌م سیاسیانه‌، وه‌ک ئه‌وه‌ وایه‌ که‌ من به‌ تۆ بڵێم: خنجه‌رێکم به‌رێ به‌ بیکه‌م به‌ ورگتا.
به‌هه‌رحاڵ کاتی ئه‌وه‌ هاتوه‌ که‌ ئیتر به‌ سوێند و قسه‌ی ئاودار و به‌ڵێنیه‌ درۆێنه‌کانی هیچکامیان بروا نه‌که‌ین، به‌ پشت به‌ستن به‌ خۆمان و هێزی رێکخراوی خۆمان، بۆ بنیاتنانی کوردستانێکی ئاوه‌دان سکۆلار و بۆ هه‌موان، بۆ گه‌یشتن به‌ مافه‌ تاک و کۆمه‌ڵاێتیه‌ ئینسانیه‌کانمان ده‌ست به‌ کار بین. ئه‌گه‌ر ئیراده‌ بکه‌ین و عه‌قڵ و شعور و ویژدان له‌ بری هه‌ست و سۆز به‌کار بێنین، به‌ دڵنیاییه‌وه‌ له‌ داهاتودا ئیتر خۆزگه‌ به‌ پار ناخوازین!
ڕێکه‌وتی بڵاوکردنه‌وه 2014-07-03 12:05:56
به‌شی ( کۆمه‌لایه‌تی ) ئاماده‌کرد ( نووسینی: عوسمان - م )



قه‌رار, بو, بێن, و, شادی, له‌گه‌ڵ, خۆێان, بێنن, هاتن, به‌ڵام, مه‌رگ, و, ئاواره‌یی, و, ره‌نجه‌رۆیی, و, ماڵوێرانیان, هێنا, ساڵان, تێپه‌ری, و, وتیان, په‌له‌نووسینی, عوسمان, , مساڵ, له‌, دوای, ساڵ, خۆزگه‌مان, به‌, پار Tags





دینی ئیسلام



وَقَالَتِ الْيَهُودُ لَيْسَتِ النَّصَارَىٰ عَلَىٰ شَيْءٍ وَقَالَتِ النَّصَارَىٰ لَيْسَتِ الْيَهُودُ عَلَىٰ شَيْءٍ وَهُمْ يَتْلُونَ الْكِتَابَ ۗ كَذَٰلِكَ قَالَ الَّذِينَ لَا يَعْلَمُونَ مِثْلَ قَوْلِهِمْ ۚ فَاللَّـهُ يَحْكُمُ بَيْنَهُمْ يَوْمَ الْقِيَامَةِ فِيمَا كَانُوا فِيهِ يَخْتَلِفُونَ ﴿١١٣﴾ وَمَنْ أَظْلَمُ مِمَّن مَّنَعَ مَسَاجِدَ اللَّـهِ أَن يُذْكَرَ فِيهَا اسْمُهُ وَسَعَىٰ فِي خَرَابِهَا ۚ أُولَـٰئِكَ مَا كَانَ لَهُمْ أَن يَدْخُلُوهَا إِلَّا خَائِفِينَ ۚ لَهُمْ فِي الدُّنْيَا خِزْيٌ وَلَهُمْ فِي الْآخِرَةِ عَذَابٌ عَظِيمٌ ﴿١١٤﴾ وَلِلَّـهِ الْمَشْرِقُ وَالْمَغْرِبُ ۚ فَأَيْنَمَا تُوَلُّوا فَثَمَّ وَجْهُ اللَّـهِ ۚ إِنَّ اللَّـهَ وَاسِعٌ عَلِيمٌ ﴿١١٥﴾ وَقَالُوا اتَّخَذَ اللَّـهُ وَلَد ...